Një analizë mbi shtimin e përdorimit të forcës nga ana e shtetit dhe shoqërimet në grup në rrugët e kryeqytetit u prezantua nga ish-prokurori Eugen Beçi, i cili ishte i ftuar mbrëmjen e kaluar në emisionin Prime News24.
Ai theksoi se qeveria po abuzon me Policinë e Shtetit për të fshehur një krizë të rëndë politike dhe sociale, duke paralajmëruar se në rast se shteti nuk respekton dinjitetin e qytetarit, ai shndërrohet nga një shtet i së drejtës në një grup të organizuar individësh kundër një grupi tjetër.
Beçi vuri në dukje se përballjet në rrugë nuk mund të zgjidhen me mjete shtypëse, sepse shkaku i pakënaqësisë nuk është rendi publik, por dështimi i kontrollit politik. Policia po përdoret si një barrierë për të trajtuar një situatë të tillë dhe nuk mund të gjendet një zgjidhje përmes përdorimit të plumbave të gomës ose ujit me presion. Sipas tij, kjo është një krizë e lidershipit që lidhet me problemet politiko-sociale të vendit. Ai paralajmëroi se vendi do të vazhdojë të përballet me situata të tilla që askush nuk i dëshiron, por që asnjë nga pushteti ekzekutiv dhe legjislativ nuk përpiqet t’i ndalojë. Nëse policia përdoret si barrierë, situata do të arrijë në një pikë ku nuk do të mund të kontrollohet më.
Ish-prokurori deklaroi se shkelja e lirive themelore gjatë shoqërimeve dhe ndërhyrjeve të policisë dëmton drejtpërdrejt bazat e shtetit të së drejtës.
“Policia po përdoret si një barrierë për të zgjidhur një situatë të tillë. Nuk mund të shohim një zgjidhje përmes përdorimit të plumbave të gomës ose ujit me presion. Nuk është krizë e rendit publik. Është një krizë e lidershipit dhe ka lidhje me problemet politiko-sociale të vendit. Do të jemi në situata të tilla që askush nuk i dëshiron, por askush nuk përpiqet t’i ndalojë nga pushteti ekzekutiv dhe legjislativ. Nëse policinë e përdor si barrierë, do të arrish në një situatë të tillë që nuk mund të menaxhohet.
Shteti, pushteti ekzekutiv, çdo organ duhet të ketë vetëm një qëllim: Kushtetutën e Shqipërisë, që nënkupton dinjitetin dhe lirinë e qytetarit. Por ata po largohen nga kjo. Jo vetëm liria kur ecën në rrugë, por edhe kur shoqërohen në polici, apo edhe kur kryejnë vepra të dhunshme. Edhe në gjendje të jashtëzakonshme — që nuk është shpallur zyrtarisht, ka disa liri nga të cilat nuk hiqet dorë dhe duhet të respektohen. Prandaj është shteti, ose përndryshe nuk do të quhet më shtet, por një grup i organizuar individësh kundër një grupi tjetër”, u shpreh ai.
Burimi: gazetashqiptare.al
