Akademiku Vllado Kambovski e konsideron të arsyeshëm propozimin e Ministrisë së Drejtësisë që provimi i jurisprudencës të zhvillohet në të dy gjuhët, maqedonisht dhe shqip. Ky koment vjen pas refuzimit të studentëve shqiptarë dy ditë më parë, të cilët kërkojnë që i gjithë provimi të mbahet vetëm në gjuhën shqipe dhe kanë paralajmëruar protesta të reja nëse kërkesa e tyre nuk plotësohet.
Kryeministri Hristijan Mickoski mban një qëndrim të vendosur që pjesa gojore e provimit të vazhdojë të zhvillohet në maqedonisht, duke e cilësuar këtë gjuhë si “lingua franca” të sistemit gjyqësor. Ndërkohë, në një deklaratë për “Sloboden Peçat”, Kambovski thekson se çështja më thelbësore është harmonizimi i terminologjisë juridike dhe i kurrikulave në fakultetet e drejtësisë. Ai ka propozuar një nismë për unifikimin e terminologjisë dhe të literaturës së detyrueshme.
“Në rrethanat e tanishme, ky propozim duket i arsyeshëm po të kemi parasysh se bëhet fjalë për fushat më delikate të drejtësisë, ku harmonizimi i terminologjisë ligjore dhe përdorimi i saj në gjuhë të ndryshme ka rëndësi të jashtëzakonshme. Terminologjia juridike në vendin tonë nuk është mjaftueshëm e zhvilluar dhe e përpunuar për të gjitha gjuhët që kërkohen për provim, dhe në anën tjetër, harmonizimi i kurrikulave është i domosdoshëm në të gjitha fakultetet juridike, jo vetëm për këto dy lëndë, por edhe për të tjerat. Për këtë arsye i sugjerova Ministrit të Drejtësisë dhe kolegëve të tjerë që të nisin një iniciativë sipas së cilës të gjitha fakultetet juridike, pavarësisht nga gjuha e studimit, të kenë një fond të përbashkët të njësive programore të detyrueshme, lëndë që përkojnë me përmbajtjen e programeve, si dhe literaturë të detyrueshme të harmonizuar për të gjitha ato lëndë, qoftë në maqedonisht, anglisht, shqip apo ndonjë gjuhë tjetër”, deklaroi Kambovski.
Sipas akademikut, kjo qasje do të zgjidhte problemet më thelbësore, jo vetëm çështjen e gjuhës së provimit. Ai thekson se ajo që ka më shumë rëndësi është cilësia e njohurive praktike që këta studentë do të kenë nesër kur të hyjnë në sistemin gjyqësor dhe të ushtrojnë profesionet ligjore, në mënyrë që të arrijnë qëllimin e ligjit — drejtësinë.
Burimi: www.albeu.com
