Policia e Tiranës ka identifikuar një ambient tjetër ku ruheshin lëndë piroteknike që dyshohen si të kontrabanduara, të cilat mendohet se shërbenin për t’i furnizuar personat që merrnin pjesë në tubime. Gjatë operacionit “Fireworks 3”, u arrestua një burrë 51-vjeçar, pasi në magazinën që ai administronte në zonën e “Tregut Çam” u gjetën 1853 fishekzjarre.
Arrestimi dhe sekuestrimi i materialeve piroteknike
Sipas Policisë, i arrestuari me inicialet D. K. nuk kishte licencë për shitjen e këtyre produkteve dhe as dokumentacion për blerjen e tyre. Mallrat piroteknike janë sekuestruar si provë materiale.
Nga hetimet paraprake dyshohet se 51-vjeçari u ka shitur lëndë piroteknike personave të maskuar, të cilët kanë kryer veprime të dhunshme gjatë tubimit të 24 tetorit 2026.
Qëllimi i operacionit “Fireworks 3”
Operacioni “Fireworks 3” synon identifikimin dhe ndalimin e personave që dyshohet se furnizojnë pjesëmarrësit në tubime me sende të kundërligjshme, të përdorura për akte dhune ndaj punonjësve të Policisë dhe dëmtimin e objekteve publike e private.
Ky është rasti i dytë i evidentuar nga Policia e Tiranës brenda pak ditësh. Një ditë më parë, uniformat blu sekuestruan 47 pako me fishekzjarre në një banesë në rrugën “Zela”, të cilat, sipas hetimeve, shiteshin për qëllime të kundërligjshme.
Materialet procedurale për rastin e 51-vjeçarit i janë referuar Prokurorisë për veprime të mëtejshme.
Burimi: euronews.al
