Me mbështetjen e UNICEF Shqipëri dhe partnerëve, institucioni i përkujdesjes rezidenciale në Bashkinë Korçë është transformuar në një Qendër për Mbështetjen e Fëmijës dhe Familjes, duke orientuar shërbimet nga kujdesi institucional drejt mbështetjes me bazë familjen dhe komunitetin.
Reforma e deinstitucionalizimit
Përmes reformës së deinstitucionalizimit dhe politikave të kujdesit alternativ, synohet ndërtimi i një sistemi që parandalon ndarjen e fëmijëve nga familjet, forcon kapacitetet prindërore dhe garanton një mjedis familjar të sigurt për çdo fëmijë.
Financimi nga Fondi Social
Ministria e Shëndetësisë dhe Mirëqenies Sociale, nëpërmjet mekanizmit të Fondit Social, ka financuar Bashkinë Korçë që prej vitit 2021. Deri në vitin 2026, vlera totale e financimit të akorduar për këtë shërbim arrin në 35,296,014 lekë, ndërsa mbështetja financiare vijon në masën 30% të vlerës fillestare të shërbimit.
Qëndrimi i ministres
Ministrja e Shëndetësisë, Klodiana Spahiu, tha se investimi për fëmijët është investim për të ardhmen dhe kërkoi që shembulli i Korçës të shtrihej në të gjithë Shqipërinë.
“Kemi që në 2018 që punohet për pjesën ligjore dhe unë sot jam e kënaqur që të miratohen të gjithë vendimet e Këshillit të Ministrave që përkthejnë këtë ligj në realitet. Mosha e fëmijërisë është ajo që tregon sesi do të jetë një njeri në të ardhmen. Nëse ne nuk investojmë te fëmijët, ne nuk kemi investuar për shoqërinë. Shembullin e Korçës ta çojmë në çdo qytet. Është projekti i vetëm që nuk lë pa mbështetje prindërore asnjë fëmijë”, tha mes të tjerash ministrja Spahiu.
Zgjerimi i shërbimeve për fëmijët me aftësi të kufizuara
Gjithashtu, gjatë vitit 2026, përmes Fondit Social është financuar edhe zgjerimi i shërbimeve për fëmijët me aftësi të kufizuara pranë SHMFF-së.
Burimi: shqiptarja.com
