Elon Musk ka bërë të ditur se SpaceX dhe Tesla po vlerësojnë mundësinë e një bashkimi, një hap që do të krijonte një gjigant korporativ me vlerë mbi 3 trilionë dollarë.
Musk deklaroi të martën se dy nga kompanitë e tij më të mëdha kanë ngritur komitete të veçanta për të analizuar një bashkim të tillë.
Shefi ekzekutiv i SpaceX dhe Tesla shtoi se ideja kishte “shumë vlerë”, duke marrë parasysh punën e përbashkët të kompanive në fushën e inteligjencës artificiale, megjithëse komitetet nuk kanë arritur ende në një marrëveshje për ndonjë propozim konkret.
“Ata duhet të paraqesin diçka dhe më pas kjo duhet t’u prezantohet aksionarëve për votim”, u shpreh Musk gjatë një telefonate për njoftimin e rezultateve financiare të SpaceX.
Musk, njeriu më i pasur në botë me një pasuri neto që kalon 900 miliardë dollarë, theksoi se një bashkim do të duhej të kalonte “pragun e lartë” të një vote prej 50% mes aksionarëve të Teslës.
“Disa njerëz mendojnë se bashkimi i SpaceX me Tesla është i garantuar, dhe mendoj se kjo do të ishte një mbivlerësim”, tha Musk.
“A mendoj se do të ishte një ide e mirë? Po. Por në fund të fundit, aksionarët duhet ta mbështesin këtë”, shtoi ai.
Një bashkim SpaceX-Tesla do të shënohej si transaksioni më i madh korporativ në histori, duke tejkaluar ndjeshëm bashkimin prej 1.25 trilion dollarësh mes SpaceX dhe xAI në shkurt.
Sipas vlerësimeve aktuale, SpaceX dhe Tesla renditen përkatësisht si kompanitë e shtata dhe e njëmbëdhjeta më të mëdha në botë, me një kapitalizim të kombinuar tregu prej afërsisht 3.5 trilionë dollarësh.
Jerayr Haleblian, ekspert i bashkimeve dhe blerjeve në Universitetin e Kalifornisë, Riverside, vlerësoi se një bashkim SpaceX-Tesla ka “logjikë të shëndoshë” që e mbështet atë.
Aksionet e SpaceX, të cilat u listuan publikisht në qershor përmes Ofertës Fillestare Publike (IPO) më të madhe të të gjitha kohërave, u rritën me mbi 8 përqind në tregtimin pas orarit zyrtar pas komenteve të Musk.
Deklaratat e Musk erdhën ndërsa SpaceX raportoi të martën fitimin e parë tremujor, i nxitur nga rritja e fortë në divizionet e inteligjencës artificiale dhe internetit satelitor.
Fitimi neto arriti në 4.4 miliardë dollarë në tremujorin korrik-shtator, një kthesë nga një humbje neto prej 1.05 miliardë dollarësh një vit më parë.
Fitimi në tre tremujorët e parë arriti në 413 milionë dollarë, krahasuar me një humbje prej 2.59 miliardë dollarësh gjatë të njëjtës periudhë të vitit të kaluar.
Burimi: euronews.al
