Shefja e diplomacisë evropiane, Kaja Kalas, deklaroi sot se presidenti rus Vladimir Putin po i shënjestron qartë civilët dhe po shton sulmet hibride në të gjithë kontinentin evropian.
Ajo theksoi se përkeqësimi i situatës nga ana e Rusisë në Detin e Zi përbën një rrezik për jetën e njerëzve, stabilitetin e rajonit dhe sigurinë ushqimore në nivel botëror.
“Rusia nuk po arrin fitore në fushën e betejës në Ukrainë. Në vend të kësaj, Putini po i sulmon hapur civilët dhe po intensifikon veprimet hibride në pjesën tjetër të Evropës”, u shpreh Kalas në fjalën e saj para eurodeputetëve në Strasburg.
Kalas theksoi gjithashtu rëndësinë e një shkëmbimi më efikas të të dhënave të inteligjencës, të forcimit të kapaciteteve mbrojtëse dhe të koordinimit me NATO-n në rast të ndonjë incidenti të rëndë sigurie.
Ajo shtoi se BE-ja, së bashku me partnerët ndërkombëtarë, përfshirë Turqinë dhe Indinë, po punon për të arritur një marrëveshje për lirinë e lundrimit në Detin e Zi.
“Ukraina propozoi një marrëveshje të tillë, ndërsa Rusia e refuzoi atë… Angazhimi diplomatik duhet të shoqërohet me presion të vazhdueshëm ndaj Moskës dhe me mbështetje për Ukrainën”, tha Kalas.
Ajo vuri në dukje se avionët luftarakë rumunë F-16 rrëzuan dy dronë mbi ujërat territoriale të Rumanisë të shtunën, duke deklaruar se gjashtë sulme të dyshuara me dronë rusë brenda dhjetë ditësh përbënin një përshkallëzim të rrezikshëm dhe të papranueshëm.
“Ekipet e shpëtimit vazhdojnë të kërkojnë për shtatë marinarë të zhdukur pas një sulmi me dron ndaj dy anijeve cisternë pranë bregdetit rumun të Detit të Zi”, tha Kalas.
Sipas saj, që nga mesi i korrikut, Rusia ka shtuar sulmet ndaj rrugëve të eksportit të Ukrainës, prandaj Ukraina po humbet rreth 60 milionë euro në ditë nga eksportet.
Kalas kujtoi se Ukraina zë rreth 15 për qind të eksportit botëror të misrit, 10 për qind të eksportit të grurit, 15 deri në 20 për qind të eksportit të elbit dhe rreth 50 për qind të eksportit të vajit të lulediellit, ndërsa rreth 90 për qind e këtyre produkteve transportohen përmes Detit të Zi.
Ajo paralajmëroi se sulmet ruse ndaj infrastrukturës bujqësore, porteve, anijeve, kalimeve kufitare dhe depove të grurit të Ukrainës rrezikojnë furnizimin me ushqim, veçanërisht në Afrikë, Azi dhe Lindjen e Mesme.
“Veprimet e Rusisë e bëjnë më të vështirë për njerëzit në mbarë botën sigurimin e ushqimit në tryezat e tyre”, tha kreu i diplomacisë evropiane.
Kalas deklaroi se çmimet globale të drithërave kanë arritur nivelin më të lartë që nga shkurti i vitit 2023 dhe bëri thirrje për krijimin e menjëhershëm të një kalimi të sigurt për anijet civile dhe tregtare në Detin e Zi.
Ajo paraqiti tre linja veprimi të BE-së: ruajtjen e aksesit të Ukrainës në tregjet ndërkombëtare, forcimin e sigurisë detare në Detin e Zi dhe në Danub dhe rritjen e presionit diplomatik mbi Moskën.
Sipas saj, eksporti i grurit përmes rrugëve alternative në kuadër të iniciativës së BE-së “Korridoret e Solidaritetit” është rritur me pothuajse dy milionë ton që nga korriku, por këto rrugë janë gjithashtu të rrezikuara për shkak të sulmeve në pikat kufitare me Moldavinë, Rumaninë dhe Poloninë.
Burimi: euronews.al
