Në Shqipëri, shqetësimi kryesor lidhet me sigurinë dhe mirëqenien e fëmijëve në internet, një temë që del më e theksuar se mesatarja e vendeve të Ballkanit Perëndimor.
Shqetësimi për fëmijët në rrjet
Sipas raportit Balkan Barometer 2025, të publikuar nga Këshilli i Bashkëpunimit Rajonal (RCC), 50% e të anketuarve në Shqipëri e përmendin sigurinë dhe mirëqenien e fëmijëve si shqetësimin kryesor që lidhet me përdorimin e internetit. Kjo është 7 pikë përqindje mbi mesataren e Ballkanit Perëndimor, ku këtë shqetësim e ndajnë 43% e qytetarëve.
Krimet dhe rreziqet financiare
Në vendin e dytë renditen krimet në internet, si vjedhja e të dhënave personale apo e informacionit të kartave bankare. Për këtë rrezik shprehen të shqetësuar 39% e shqiptarëve, pothuajse në të njëjtin nivel me mesataren rajonale prej 40%.
Një tjetër element ku Shqipëria qëndron nën mesataren rajonale është siguria e pagesave online. Vetëm 21% e të anketuarve në vend e identifikojnë këtë si shqetësim, kundrejt 26% në nivel rajonal. Ndërkohë, 13% shprehen të shqetësuar për mungesën e aftësive të nevojshme digjitale për të përdorur teknologjinë në mënyrë aktive, njësoj sa mesatarja e rajonit.
Inteligjenca artificiale dhe punësimi
Edhe frika se përdorimi i inteligjencës artificiale mund të çojë në humbjen e vendeve të punës rezulton relativisht e ulët në Shqipëri. Vetëm 6% e të anketuarve e përmendin këtë si shqetësim, krahasuar me 8% në Ballkanin Perëndimor.
Qytetarët që nuk shqetësohen
Megjithatë, një nga të dhënat më interesante të raportit lidhet me qytetarët që nuk shohin arsye për t’u shqetësuar nga shtimi i përdorimit të internetit dhe mjeteve digjitale. Në Shqipëri, kjo përgjigje regjistron 30%, kundrejt 22% në mesataren rajonale. Shqipëria ka kështu përqindjen më të lartë në rajon të personave që deklarojnë se nuk shqetësohen nga këto zhvillime.
Burimi: shqiptarja.com
