Përrenjtë dalin nga shtrati, fshatra të izoluara
Reshjet e shiut dhe erërat e forta kanë shkaktuar probleme në disa fshatra të qarqeve Kukës dhe Shkodër. Përrenjtë kanë dalë nga shtrati, duke sjellë inerte nëpër rrugë. Po ashtu janë dëmtuar shtyllat elektrike.
Konkretisht janë pa energji elektrike fshatrat: Bushat, Nangë, Çami dhe Leproj në Bashkinë e Kukësit, si dhe Kishaj, Pogaj në Has dhe Lekbibaj në Tropojë.
Në disa rrugë ka inerte, por qarkullimi nuk është bllokuar, lëvizet me vështirësi.
Situata në Shkodër
Në Shkodër, situata më kritike është në Njësinë Administrative Shalë, ku disa fshatra janë në izolim për shkak të gurëve dhe dheut në rrugë. Konkretisht, aksi Theth–Ndërlysaj është i pakalueshëm që nga dita e djeshme. Edhe fshati Kamicë i Malësisë së Madhe është i izoluar nga prurjet e shumta të Përroit të Thatë.
Ekipet punojnë për pastrimin e rrugëve
Ekipet e Bashkisë Shkodër po punojnë për pastrimin e aksit Theth–Ndërlysaj, ku reshjet kanë shkaktuar rrëshqitje gurësh në rrugë. Kryetari i Bashkisë Shkodër, Benet Beci, njoftoi në një postim në rrjetet sociale se një pjesë e konsiderueshme e aksit është pastruar dhe se puna vijon për largimin e gurëve dhe inerteve nga segmentet e prekura.
Beci njoftoi gjithashtu se një fadromë është nisur drejt fshatit Xhan, në Njësinë Administrative Pult, për të ndërhyrë në një tjetër segment rrugor të prekur nga reshjet.
Gjendja e përgjithshme dhe thirrja e autoriteteve
Sipas Prefekturës së Qarkut Shkodër, situata paraqitej përgjithësisht e qëndrueshme në orën 09:00 të së shtunës, 14 nëntor, por disa akse rrugore në Shalë vijojnë të jenë të bllokuara. Në Bashkinë Shkodër nuk raportohen përmbytje banesash, dhe as prani uji në banesat e fshatit Kamicë.
Sipas Drejtorisë së Ujitjes dhe Kullimit Lezhë, gjatë 48 orëve të fundit janë regjistruar reshje të konsiderueshme në zonat malore dhe rreth 25 milimetra në zonat fushore. Nuk raportohen dëmtime në infrastrukturën e kullimit, ndërsa vijojnë inspektimet përgjatë lumit Kir.
Autoritetet u bëjnë thirrje qytetarëve, veçanërisht banorëve të zonave malore, të shmangin kalimin në rrugët e dëmtuara dhe pranë përrenjve me prurje të larta, dhe të ndjekin njoftimet zyrtare.
Burimi: shqiptarja.com
