Rute Cardoso, bashkëshortja e të ndjerit futbollist portugez Diogo Jota, ka ndarë detaje prekëse nga komunikimi i saj i fundit me të, pak përpara aksidentit tragjik që i mori jetën atij dhe vëllait të tij, André Silva, në korrik 2025.
Rrëfimi në biografinë e re
Dëshmia e saj është përfshirë në biografinë e re “Diogo Jota: Forever in Our Hearts”, e cila i kushtohet jetës dhe karrierës së futbollistit portugez dhe përmban dëshmi nga familjarë, bashkëlojtarë, trajnerë dhe njerëz të tjerë të afërt me të. Botimin e librit e ka konfirmuar zyrtarisht edhe Liverpooli.
Cardoso ka treguar se, vetëm pak minuta pasi Jota dhe vëllai i tij u nisën për udhëtim, ajo i dërgoi një mesazh për t’i uruar rrugë të mbarë. Futbollisti iu përgjigj me një emoji, ndërsa ajo i kërkoi të tregohej i kujdesshëm dhe t’i mbante sytë te rruga.
Ky ishte komunikimi i fundit në të cilin Jota iu përgjigj.
Mesazhi që nuk u lexua kurrë
Më pas, bashkëshortja e tij dëshironte t’i tregonte një video nga dasma e tyre, e cila ishte organizuar si befasi nga shoqërueset e saj dhe ishte filmuar nga fotografi i dasmës. Ajo ia dërgoi mesazhin futbollistit, por këtë herë nuk mori asnjë përgjigje.
Mesazhi u pranua, por nuk u lexua kurrë.
Në fillim, Cardoso nuk u shqetësua, pasi e dinte se bashkëshorti i saj ishte në rrugë. Megjithatë, kur kaloi koha e pritshme për mbërritjen e tyre në hotelin ku planifikonin të qëndronin, ajo nisi t’i dërgonte mesazhe të tjera, të cilat nuk po dorëzoheshin.
Ajo u përpoq të kontaktonte edhe vëllain e Jotas, André, por as mesazhet drejtuar atij nuk u dorëzuan. E shqetësuar, Cardoso kontaktoi hotelin, ku u informua se dy vëllezërit nuk kishin mbërritur ende.
Burimi: euronews.al
