Kreshnik Hajrizi ka kaluar pesë muaj larg fushave të futbollit, duke u rikthyer sërish dhe duke treguar për vështirësitë e procesit të rikuperimit. Mbrojtësi i Kosovës shtoi gjithashtu se lajmi për ardhjen e fëmijës së tij ishte një nga motivet kryesore që e ndihmoi të përballonte momentet më të vështira.
Rikthimi në fushë pas operacionit
Futbollisti i Sionit u aktivizua fundjavën e kaluar në ndeshjen kundër Cham, e vlefshme për Kupën e Zvicrës. Ai nuk kishte luajtur që nga 17 maji, për shkak të një inflamacioni në zonën pubike që shkaktonte dhimbje në muskujt aduktorë. Për këtë arsye, Hajrizi iu nënshtrua një ndërhyrjeje kirurgjikale.
Ky rikthim kishte një rëndësi të veçantë për të, sidomos sepse gjatë ndeshjes nuk ndjeu shqetësime në zonën që e kishte mbajtur jashtë fushave për disa muaj.
“Ishte një kënaqësi e jashtëzakonshme. Fakti që gjatë ndeshjes nuk pata dhimbje në muskujt aduktorë dhe në ijë tregon se puna ka shkuar mirë. Nuk e përshpejtova procesin. Madje, planin e rikuperimit e zgjata edhe me një javë. Tani muskujt janë në gjendje shumë të mirë dhe nuk kam më probleme. Më duhet vetëm të rifitoj kondicionin fizik”, deklaroi Hajrizi.
Vendimi për t’u operuar ishte veçanërisht i vështirë për mbrojtësin kosovar, pasi vinte pas një sezoni të lodhshëm me Sionin dhe me Kombëtaren e Kosovës. Ai solli në kujtesë edhe dëmtimin e pësuar në vitin 2023, kur luante për Luganon dhe kishte dëmtuar muskujt e pasmë të kofshës.
Motivimi nga familja dhe lajmi i ardhjes së fëmijës
“Kur isha në atë dhomë në Bordo, bashkë me mjekun dhe fizioterapistin, dhe mora vesh se operacioni ishte alternativa më e mirë, më kaloi në mendje i gjithë sezoni. Mendova menjëherë për tre ose katër muajt që do të më duhej të prisja. Ishte një periudhë shumë e vështirë. Edhe qava, sepse e kuptova se po lëndohesha për herë të dytë pikërisht kur ndodhesha në formën më të mirë”, rrëfeu ai.
Gjatë kësaj kohe, Hajrizi u mbështet te familja, klubi, besimi në Zot dhe pasioni për futbollin. Megjithatë, motivimi më i madh erdhi nga një lajm i rëndësishëm që mori pak para operacionit.
“Një javë para ndërhyrjes mësova se do të bëhesha baba. Në ato momente kur gjithçka dukej e vështirë, i përsërisja vetes se nuk mund të dorëzohesha, pasi shumë shpejt në shtëpi do të ishim tre”, u shpreh futbollisti.
Ai tregoi se ekografia e fëmijës ishte një burim i madh force përgjatë gjithë periudhës së rikuperimit.
“Nuk e kisha menduar më parë se do ta shihja ekografinë së bashku me bashkëshorten. Tani mund të them se kur shikon pamjet e asaj krijese të vogël që po rritet, fiton një shtysë të jashtëzakonshme. E njëjta ndjesi të shoqëron edhe kur monton një mobilie, duke e ditur se nuk do ta përdorësh ti, por vogëlushi yt. Thuhet se ardhja e një fëmije e ndryshon një burrë dhe këtë ndryshim po e ndiej edhe unë”, tha Hajrizi.
Pas rikthimit në fushë, ai mori edhe një tjetër sinjal mbështetjeje. Tifozët e Sionit brohoritën emrin e tij kur mbrojtësi u zëvendësua në ndeshjen ndaj Cham.
“Më preku shumë dhe ma ngrohu zemrën. Tifozët tanë janë gjithmonë pranë nesh, si në ndeshjet në shtëpi, ashtu edhe në transfertë. Të ndjesh dashurinë dhe mbështetjen e tyre, kudo që luajmë, është jashtëzakonisht e rëndësishme për ne”, përfundoi Hajrizi.
Rikthimi i tij përbën një lajm të mirë edhe për Kosovën, pasi mbrojtësi Albian Hajdari pritet të mungojë në ndeshjet e nëntorit.//
Burimi: www.albeu.com
