Hoffenheimi shënoi fitoren e tretë të sezonit, duke mposhtur Bayer Leverkusenin 3-0 në derbi. Fisnik Asllani fitoi penalltinë që hapi rrugën për golin e parë.
Asllani dhe Avdullahu në fushë
Sulmuesi shqiptar qëndroi në lojë deri në minutën e 84-t, ndërsa Leon Avdullahu luajti gjatë gjithë ndeshjes dhe dha kontributin e tij në suksesin e Hoffenheimit.
Në minutën e 78-të, pas rishikimit të pamjeve në VAR, gjyqtari Daniel Siebert dha penallti për një ndërhyrje ndaj Asllanit brenda zonës. Andrej Kramarić e ekzekutoi një minutë më vonë dhe shënoi për 1-0.
Alexander Prass dyfishoi avantazhin në minutën e 89-të me një goditje të fuqishme nga jashtë zone, që përfundoi në pjesën e sipërme të portës. Pas golit ai hoqi fanellën, mori kartonin e dytë të verdhë dhe u përjashtua.
Edhe me një lojtar më pak, Hoffenheimi arriti golin e tretë në minutën e 90+5-të. Max Moerstedt shfrytëzoi një top të kthyer pas një rrëmuje në zonë dhe shënoi nga afërsia, duke vulosur rezultatin 3-0.
Kështu, Hoffenheimi siguroi tri pikë të rëndësishme në një ndeshje ku Asllani fitoi penalltinë vendimtare dhe Avdullahu luajti gjithë minutat.
Burimi: www.albeu.com
