Gjendja nuk është aspak e mirë për të, por gjithsesi ka shkaqe për të gëzuar. Nedim Bajrami doli sërish i mundur nga fusha dhe luajti shumë pak, vetëm 18 minuta, në ndeshjen që skuadra e tij Al Tauon e humbi 2-1 në transfertë ndaj Al Rijad, por arriti të shënojë.
Ndeshja dhe goli i Bajramit
Vendasit siguruan epërsinë 2-0 falë formës së shkëlqyer të yllit Bernard Mensah, i cili dha asistin për golin e parë të shënuar nga Oku dhe realizoi vetë rrjetën e dytë pas pushimit.
Mesfushori i kombëtares shqiptare, që u la jashtë kuqezinjve në këtë Ligë të Kombeve nga trajneri Rolando Maran, hyri në fushë vetëm në minutën e 72-të, si një nga përpjekjet e miqve për të shpëtuar të paktën pikën.
Mund të thuhet se e kreu mirë detyrën, pasi shënoi një gol shumë të bukur me aftësi personale në minutën e 78-të, pra vetëm 6 minuta pasi u fut në terren. Ishte rrjeta e tij e parë për këtë edicion.
Kjo nuk mjaftoi, ndonëse për Bajramin mund të jetë një nxitje se mund të bëjë më shumë.
Roli i tij te Al Tauon
Në një moshë tepër të re, 27-vjeçare, ai duket se nuk po arrin të japë maksimumin, siç i ndodhi në Itali dhe Skoci. Pasi e nisi si titullar në pesë ndeshjet e para që u aktivizua në Ligën Profesioniste Saudite, në 3 të fundit ka qenë zëvendësues duke luajtur gjithsesi 35 minuta./abcnews.al
Burimi: abcnews.al
