Rritja e tensionit politik dhe përdorimi i forcës nga ana e shtetit kundër protestuesve në Shqipëri kanë shkaktuar shqetësim te zyrtarët e lartë të Senatit të Shteteve të Bashkuara të Amerikës. Senatori Gary Peters ka bërë një reagim publik, duke iu drejtuar drejtpërdrejt autoriteteve shqiptare me kërkesën për të ndërprerë sulmet ndaj qytetarëve.
Në deklaratën e tij, senatori Peters theksoi rëndësinë e respektimit të të drejtave themelore dhe të sundimit të ligjit, duke vënë në dukje lidhjen e ngushtë të komunitetit shqiptaro-amerikan në SHBA me ngjarjet në vendin e tyre të origjinës.
Deklarata e Senatorit Gary Peters:
“Jam jashtëzakonisht i shqetësuar për përkeqësimin e situatës në Shqipëri. Autoritetet vendore duhet të frenojnë çdo veprim agresiv ndaj protestuesve paqësorë, dhe të gjithë ata që janë të përfshirë në terren duhet të angazhohen për të ulur tensionet dhe për të penguar dhunën e mëtejshme.
Miçigani është vendi i një komuniteti të fortë dhe të gjallë shqiptaro-amerikan, dhe e kuptoj se këto ngjarje prekin thellësisht shumë banorë të Miçiganit. Populli shqiptar meriton një qeveri që respekton të drejtat e tyre themelore dhe mbron sundimin e ligjit. Prandaj do të vazhdoj të mbroj paqen dhe drejtësinë për të gjithë shqiptarët.”
Burimi: gazetashqiptare.al
