Kreu i Zyrës së Kombeve të Bashkuara për të Drejtat e Njeriut, Volker Turk, ka deklaruar se demonstratat e gjera që po zhvillohen në Shqipëri, Belgjikë, Francë, Itali dhe Portugali po shkaktojnë shqetësim në lidhje me të drejtat themelore të njeriut.
Përmes një deklarate, ai apelon për qetësimin e situatës dhe shmangien e çdo forme dhune, duke theksuar rëndësinë e dialogut mes palëve. Turk mbron të drejtën për të protestuar, por njëkohësisht dënon pa ekuivok dhunën dhe shkatërrimin e pronës publike e private.
Ai shpreh gjithashtu shqetësim për përdorimin e forcës policore në mënyrë joproporcionale dhe kërkon nisjen e menjëhershme të hetimeve për çdo akuzë në këtë drejtim.
Teksti i plotë i deklaratës:
Demonstratat e gjera në Shqipëri, Belgjikë, Francë, Itali dhe Portugali po ngrenë shqetësime për të drejtat e njeriut. Unë dënoj çdo akt dhune dhe i bëj thirrje të gjithë të përfshirëve të ulin tensionet dhe të parandalojnë përshkallëzimin e dhunës. Rruga e vetme dhe më e mira përpara është një dialog gjithëpërfshirës dhe i sigurt.
Njerëzit kanë të drejtë të protestojnë në mënyrë paqësore dhe të kërkojnë që zëri i tyre të dëgjohet. Shtetet duhet t’i lehtësojnë këto të drejta.
Unë dënoj veprimet e atyre që përfitojnë nga protestat për të kryer akte dhune dhe vandalizmi ndaj pronës publike dhe private. Ata duhet të mbajnë përgjegjësi individuale.
Jam i shqetësuar nga raportimet për përdorim të panevojshëm dhe të tepruar të forcës ndaj protestuesve, përfshirë fëmijët. Shtetet duhet të garantojnë që çdo reagim i forcave të rendit të jetë i ligjshëm, i nevojshëm dhe proporcional. Akuzat për përdorim të paligjshëm të forcës duhet të hetohen menjëherë, në mënyrë efektive dhe të pavarur, duke siguruar llogaridhënie dhe mjete juridike efikase për viktimat.
Vërej disa hapa që autoritetet kanë ndërmarrë tashmë për të hetuar incidentet dhe për të ulur tensionet. Gjithashtu, u bëj thirrje shteteve të angazhojnë protestuesit, sidomos të rinjtë, në një dialog kuptimplotë, gjithëpërfshirës dhe konstruktiv, si dhe të ndërmarrin hapa konkretë për të trajtuar shqetësimet legjitime dhe thelbësore të të drejtave të njeriut lidhur me arsimin, shërbimet publike, strehimin, rritjen e kostos së jetesës dhe pabarazinë.
Burimi: tirananews.al
