Gjykata Kushtetuese miratoi një rregullore për shqyrtimin e çështjeve që lidhen me vendimet e Gjykatës së Strasburgut për vetingun e magjistratëve apo kërkesa të tjera për rishqyrtim, duke zgjatur mandatin e vëzhguesve ndërkombëtarë edhe në këtë fazë të procesit.
Miratimi i aneksit të rregulloresë
Gjykata Kushtetuese miratoi më 2 nëntor aneksin e Rregullores për Procedurat Gjyqësore gjatë shqyrtimit të çështjeve që lidhen me vetingun e magjistratëve. Këto janë çështje për të cilat Strasburgu ka gjetur shkelje gjatë gjykimit të tyre në ish-Kolegjin e Posaçëm të Apelimit, ose çështje për të cilat subjektet kanë kërkuar apo do të kërkojnë rishikim. Vendimin e morën me votat e kryetares Fiona Papajorgji dhe të anëtarëve Sandër Beci, Genti Ibrahimi, Ilir Toska, Marsida Xheferllari, Asim Vokshi e Marjana Semini. Kundër votoi vetëm gjyqtarja Sonila Bejtja.
Sipas aneksit të publikuar në Fletoren Zyrtare, qëllimi i tij është të sigurojë ushtrimin efektiv të juridiksionit të rivlerësimit kalimtar të gjyqtarëve dhe prokurorëve nga Gjykata Kushtetuese. Kjo bëhet duke përcaktuar rregulla procedurale që garantojnë një proces të rregullt ligjor dhe respektimin e të drejtave të pjesëmarrësve.
Procedura e shqyrtimit
Kërkesat e magjistratëve që kanë marrë vendim pozitiv në Gjykatën e Strasburgut do të shqyrtohen nga një kolegj prej tre gjyqtarësh të Gjykatës Kushtetuese, ku bën pjesë edhe relatori. Nëse kërkesa nuk plotëson kriteret e parashikuara, kolegji vendos moskalimin e çështjes në seancë plenare. Kur ndonjë nga gjyqtarët e kolegjit nuk ndan mendimin e tjerëve, kërkesa i kalon për shqyrtim paraprak Mbledhjes së Gjyqtarëve. Në asnjërën nga këto faza nuk shqyrtohet themeli i çështjes.
Vendimi për moskalimin e çështjes në seancë plenare merret njëzëri nga kolegji dhe me shumicën e votave nga Mbledhja e Gjyqtarëve. Shqyrtimi në seancë plenare kërkon praninë e jo më pak se dy të tretave të anëtarëve të gjykatës, ndërsa vendimi merret me shumicën e votave të të gjithë gjyqtarëve. Abstenimi nuk lejohet, dhe vendimi duhet të nënshkruhet nga të gjithë gjyqtarët e pranishëm.
Roli i vëzhguesve ndërkombëtarë
Si gjatë procesit të vetingut, edhe në shqyrtimin e këtyre çështjeve do të jenë të pranishëm vëzhguesit e Operacionit Ndërkombëtar të Monitorimit, me kompetencat e përcaktuara në aneksin e Kushtetutës. Ata do të kenë akses në dosjen gjyqësore dhe në dokumentacionin e lidhur me rivlerësimin, dhe do të jenë të pranishëm në të gjitha fazat e shqyrtimit, përfshirë dhomën e këshillimit dhe marrjen e vendimit.
Vëzhguesit mund të paraqesin gjetje për çështjet e rivlerësimit kalimtar, përfshirë mendime me shkrim për rrethana konkrete ose fakte që dalin gjatë shqyrtimit. Këto mendime mund të merren parasysh nga Gjykata Kushtetuese, por nuk kanë vlerë provë. Sipas rregullores, prania e vëzhguesve ka karakter monitorues dhe nuk përfshin të drejtën e votës apo pjesëmarrjen në vendimmarrje.
Kërkesat dhe veprimet e mëparshme
Të gjitha kërkesat e paraqitura nga subjektet e rivlerësimit në ish-Kolegjin e Posaçëm të Apelimit për rishikimin e vendimeve, që nuk janë përfunduar, konsiderohen të vlefshme dhe ruajnë efektet e tyre juridike. Po kështu, veprimet procedurale të kryera nga Gjykata Kushtetuese deri në hyrjen në fuqi të aneksit mbeten të vlefshme.
Çështjet e pazgjidhura
Aktualisht, katër magjistratë, Ervin Metalla, Gentian Osmani, Adnan Kosova dhe Ferdinand Elezi, si dhe ndihmësi ligjor Eugen Papandile, kanë shkelje të nenit 8 të Konventës të konstatuara nga Gjykata Evropiane për të Drejtat e Njeriut gjatë procesit të tyre të vetingut. Për ta, shkarkimet janë cilësuar joproporcionale. Gjithashtu, janë gjetur shkelje të nenit 6 të Konventës në vetingun e magjistratëve të tjerë, lidhur me procesin e rregullt ligjor.
Burimi: gazetadita.al
