Deputeti gjerman në Parlamentin Evropian, Michael Gahler, ka dhënë një reagim për protestat që po mbahen aktualisht në Shqipëri.
Eurodeputeti gjerman, i cili shërben si zëdhënës i grupit parlamentar të Partisë Popullore Evropiane, thekson se qytetarët shqiptarë po protestojnë prej një kohe të gjatë kundër korrupsionit dhe kundër qeverisë.
“Duke qenë në krye të delegacionit të PE-së për vëzhgimin e zgjedhjeve dhe duke dëshmuar lidhjet midis shtetit, partisë në pushtet dhe krimit të organizuar, e shoh se sa gjatë kanë protestuar qytetarët kundër korrupsionit dhe qeverisë, duke ngritur shqetësime që prekin thelbin e perspektivës së integrimit evropian të Shqipërisë,” shkruan Gahler.
Eurodeputeti gjerman ishte në krye të vëzhguesve në zgjedhjet që u zhvilluan vitin e kaluar në Shqipëri.
Pikërisht për këtë arsye ai deklaron se ka dëshmuar nga afër lidhjet mes partisë shtet dhe krimit të organizuar në Shqipëri.
Në atë kohë, Gahler bëri deklaratën e bujshme se ‘krimi i organizuar nuk lejon rotacionin politik në Shqipëri’.
Burimi: gazetashqiptare.al
