Aktori gjerman August Diehl, i bërë i njohur në mbarë botën për interpretimin në filmin e Quentin Tarantinos “Inglourious Basterds”, do të vlerësohet me çmimin e filmit “Europa”.
Festivali Ndërkombëtar i Filmit në Braunschweig bëri të ditur sot se aktori 50-vjeçar do të jetë marrësi i këtij çmimi, si njohje për punën e tij si një ndër aktorët gjermanë më të dalluar në role karakteristike në arenën ndërkombëtare.
Çmimi dhe ceremonia e ndarjes
Çmimi arrin vlerën e 25 mijë eurove dhe përbën shpërblimin më të lartë monetar që jep ky festival. Diehl do ta pranojë atë më 14 nëntor, gjatë ditëve të festivalit.
Në njoftimin e vet, festivali vuri në dukje se Diehl është një aktor që dallohet si në prodhimet e mëdha të Hollivudit, ashtu edhe në filmat artistikë më të veçantë.
Ajo që e bën karrierën e tij veçanërisht të dallueshme është shumëllojshmëria e roleve që ka interpretuar.
Rolet dhe karriera e August Diehl
Ai ka interpretuar një oficer të SS-së naziste në filmin “Inglourious Basterds”, luftëtarin e rezistencës Franz Jagerstätter, si dhe figura historike të tilla si Karl Marksi dhe Vladimir Lenini.
August Diehl lindi në Berlin në vitin 1976 dhe debutoi në film në vitin 1998, me filmin “23”.
Ai u bë i njohur ndërkombëtarisht në vitin 2009, falë rolit të tij në filmin e Tarantinos.
Përveç këtij filmi, në vitin 2010 ai luajti edhe në filmin “Salt”, së bashku me Angelina Jolie, ndërsa në vitin 2021 u shfaq në “The King’s Man – The Beginning”, ku interpretonin edhe Ralph Fiennes, Daniel Brühl dhe Stanley Tucci.
Diehl është aktiv edhe në teatër. Gjatë Festivalit të Filmit në Braunschweig do të shfaqet gjithashtu një përzgjedhje e filmave ku ai ka luajtur./atsh/KultPlus.com
Burimi: kultplus.com
