Pianistja shqiptare Anila Aliu është kthyer në Singapor nga Shtetet e Bashkuara të Amerikës, me ftesë të kompanisë muzikore Ding Yi Music Company, për të luajtur koncertin për piano “Liang Zhu”, nën drejtimin e dirigjentit Dedric Wong.
Përvoja artistike në Singapor
Në një postim, Aliu e ka përshkruar këtë përvojë si një nder të veçantë dhe një moment me rëndësi të posaçme artistike e kulturore. Ajo ka interpretuar muzikë kineze para publikut aziatik, mes artistëve dhe personaliteteve të njohura, përfshirë politikanë, ambasadorë, dirigjentë, drejtues të institucioneve kulturore të Singaporit, si dhe anëtarë të delegacionit të ish-kryeministrit.
Vlerësimi i pianistes për këtë eksperiencë
Sipas pianistes shqiptare, ky interpretim dëshmon fuqinë e muzikës për të tejkaluar kufijtë gjeografikë dhe për të bashkuar kultura të ndryshme. Aliu ka shprehur mirënjohje për ftesën, vlerësimin dhe besimin që iu dha, duke e konsideruar këtë përvojë si një moment të rëndësishëm në rrugëtimin e saj artistik./KultPlus.com
Burimi: kultplus.com
