Vetëm një ditë pas publikimit të një videoje që u përhap gjerësisht në rrjetet sociale, ku flitej për një ofertë prej 5 mijë eurosh, ish-deputeti ka konfirmuar për InfoPress Albania se efektivë policie kanë arritur në banesën e tij në Lezhë.
Ish-deputeti Eduart Ndocaj ka njoftuar redaksinë e InfoPress Albania se forcat operacionale të ardhura nga Tirana kanë mbërritur sot në banesën e tij në Manati të Lezhës, një ditë pasi një video e tij u bë virale në rrjetet sociale.
Në një bisedë telefonike me redaksinë tonë, Ndocaj ka deklaruar se rreth orës 15:00, disa efektivë të forcave operacionale kanë tentuar të thyejnë derën e banesës së tij për të hyrë brenda. Deri në këto momente, bëhet fjalë për një pretendim të konfirmuar nga vetë ish-deputeti, ndërsa rrethanat dhe arsyet e ndërhyrjes nuk janë bërë të ditura nga burime zyrtare.
Ngjarja vjen pas reagimit të bujshëm të Ndocajt ndaj kryeministrit Edi Rama, i cili kishte njoftuar një shpërblim prej 2500 eurosh për efektivët e Policisë së Shtetit të angazhuar në vijën e parë gjatë protestave.
Në videon që qarkulloi gjerësisht në rrjet, ish-deputeti iu kundërpërgjigj me ironi këtij njoftimi, duke deklaruar se ofronte 5 mijë euro për çdo deputet të Partisë Socialiste apo të Partisë Demokratike që do të përfundonte në një kosh plehrash, si dhe 10 mijë euro për çdo ministër.
Deklarata e tij u interpretua si një sulm satirik ndaj klasës politike dhe mënyrës së shpërblimit të efektivëve të policisë. Megjithatë, mbetet e rëndësishme të sqarohet nëse mbërritja e forcave operacionale në banesën e tij ka lidhje me videon e publikuar, pasi deri tani nuk ka një konfirmim zyrtar për këtë.
Ndocaj, i cili jeton prej rreth tri dekadash me familjen në Milano të Italisë, ka deklaruar se nuk frikësohet nga veprimet që, sipas tij, po ndërmerren ndaj tij. Ai ka shprehur gjithashtu mbështetjen e tij të fortë për protestën e studentëve kundër qeverisë.
InfoPress Albania do të ndjekë zhvillimet e mëtejshme për të sqaruar arsyet e mbërritjes së forcave operacionale në banesën e ish-deputetit dhe për të sjellë edhe reagimin e Policisë së Shtetit.
Burimi: gazetashqiptare.al
