Gary Neville ka ngritur akuza të rënda ndaj disa prej futbollistëve të Manchester United, duke i quajtur ata joprofesionistë dhe duke i mbajtur përgjegjës për rezultatet zhgënjyese të ekipit. Ish-kapiteni i “Djajve të Kuq” është i bindur se lojtarët kanë humbur respektin ndaj trajnerit Michael Carrick, ndërsa e ardhmja e këtij të fundit në stolin e skuadrës është gjithnjë e më e pasigurt.
Humbja ndaj Bournemouth dhe presioni mbi Manchester United
Dislata 3-0 përballë Bournemouth në “Old Trafford”, pas humbjes 4-1 ndaj Comos, ka shtuar edhe më shumë presionin mbi Manchester United dhe trajnerin e tij. Rezultatet negative kanë nxitur kritika të shumta, ndërsa Neville ka vënë gishtin mbi sjelljen dhe përkushtimin e disa lojtarëve. Gjatë një podkasti të Sky Sports, ish-mbrojtësi anglez pohoi se futbollistët nuk kanë qenë të sinqertë me trajnerin.
“Ata luajtën me të, apo jo? E mashtruan për disa muaj. Po, me të vërtetë e mashtruan. Ka disa prej tyre që nuk sillen mjaftueshëm profesionalisht. Disa nuk flenë në orarin e duhur, nuk ushqehen siç duhet dhe nuk e kanë Manchester United në mendje gjatë gjithë ditës. Ata nuk jetojnë për këtë klub ashtu siç duhet të bëjnë futbollistët profesionistë. Janë bërë arrogantë dhe disa prej tyre nuk vlejnë asgjë”, u shpreh ai me tone të ashpra.
Marrëdhënia mes Carrickut dhe lojtarëve
Ish-kapiteni i United ndaloi edhe te marrëdhënia mes Carrickut dhe lojtarëve, duke përmendur komentet e Bruno Fernandes si një shenjë shqetësuese për gjendjen brenda skuadrës.
“Ai nuk ka arritur të nxjerrë më të mirën nga këta lojtarë dhe ata janë kthyer kundër tij. Nëse Bruno e ka kritikuar publikisht me ato deklarata, imagjinoni çfarë mund të thuhet prapa skenave. Dhe nëse këto janë fjalët e kapitenit, imagjinoni çfarë ndodh në dhomat e zhveshjes kur askush nuk i dëgjon. Kjo është alarmuese”, theksoi Neville.
Burimi: kohajone.com
