Sevilla vazhdon të jetë e përfshirë në kontestin që lindi pas ndeshjes me Real Madridin, pasi ka depozituar një ankesë formale pranë La Liga për mënyrën e transmetimit televiziv të takimit të luajtur në “Santiago Bernabeu”.
Klubi andaluzian pohon se disa veprime të rëndësishme nuk u ripërsëritën sa duhet, ndërkohë që penalltia e akorduar në favor të Real Madridit ndaj Kylian Mbappes u shfaq disa herë nga kënde të ndryshme.
Sevilla veçoi katër situata të diskutueshme: një ndërhyrje të Cucurellas ndaj Peques, një përdorim të bërrylit nga Arda Güler ndaj të njëjtit lojtar, një faull të mundshëm të Konatés ndaj Robbie Ures përpara golit të dytë të madrilenëve dhe penalltinë e fituar nga Mbappe.
Klubi shprehu gjithashtu pakënaqësi për deklaratat e Sergio Carranza Lezcanos, përgjegjësit të realizimit audiovizual të La Ligës, në lidhje me mënyrën se si përzgjidhen pamjet gjatë transmetimeve.
Në ankesën e nënshkruar nga presidenti José María del Nido Carrasco, Sevilla kërkon shpjegime të hollësishme për kamerat dhe këndet e xhirimit, dorëzimin e pamjeve origjinale të veprimeve të kontestuara, ruajtjen e regjistrimeve dhe publikimin e protokolleve që rregullojnë realizimin televiziv.
Klubi kërkon gjithashtu një hetim të plotë dhe masa korrigjuese, duke pretenduar se disa prej këtyre veprimeve u lanë jashtë edhe nga përmbledhja zyrtare e ndeshjes, pavarësisht se pamjet u transmetuan më vonë nga operatorë të tjerë televizivë.
Sevilla zhvilloi edhe një takim me Komitetin Teknik të Arbitrave, por palët nuk arritën pajtim për interpretimin e veprimeve të diskutueshme.
Polemika pas ndeshjes së 18 tetorit vazhdon të jetë e fortë, me Sevillan që kërkon më shumë transparencë si në vendimet e arbitrave, ashtu edhe në mënyrën e transmetimit të ndeshjeve të La Ligës. /Express
Burimi: www.gazetaexpress.com
