Borussia Dortmundi po u ofron tifozëve fanella të nënshkruara dhe karta dhuratash si shpërblim për ata që përdorin një aplikacion i cili regjistron sa shpesh e zhbllokojnë telefonin e tyre gjatë ndeshjeve në stadium.
Modaliteti i ri për tifozët
Klubi argumenton se gjithnjë e më shumë tifozë shqetësohen nga selfiet, transmetimet dhe rrjetet sociale në tribuna, ndaj Dortmund thotë se mbështetësit mund të regjistrohen vullnetarisht për të përdorur një “modalitet tifozi” në aplikacionin e klubit, duke filluar të shtunën me ndeshjen në shtëpi kundër Eintracht Frankfurt.
Ky modalitet do të masë sa shpesh zhbllokohet telefoni gjatë ndeshjes — pa llogaritur pushimin e pjesës së parë — dhe do t’u japë pikë përdoruesve në bazë të asaj se sa pak e përdorin pajisjen, me çmime që u ofrohen atyre që grumbullojnë më shumë pikë. Sa herë që telefoni zhbllokohet, përdoruesi humbet pikë.
Skema e shpërblimeve dhe aplikacioni janë vullnetare dhe nuk ka asnjë ndalim për tifozët që përdorin telefonat e tyre.
Qëndrimi i trajnerit Niko Kovac
Trajneri Niko Kovac tha se ai tashmë i ndalon telefonat gjatë një vaktit që skuadra kalon së bashku para ndeshjes, por nuk e ka problem që lojtarët të përdorin telefona ose të mbajnë kufje në dhomën e zhveshjes ose në autobusin e ekipit.
“Djemtë janë mjaftueshëm të rritur për të kuptuar se çfarë u duhet për t’u përgatitur për ndeshjen”, tha Kovac.
“Megjithatë, mendoj se të gjithë mund të shpenzojmë pak më pak kohë duke parë telefonat tanë herë pas here. Nëse e reduktojmë kohën, të gjithë mund të përqendrohemi pak më shumë në gjëra të tjera”, shtoi ai.
Burimi: euronews.al
