Gresa Krasniqi ka bërë publike një njoftim alarmues për situatën e të atit, Jakup Krasniqi, afërsisht një muaj pasi ish-kryetari i Kuvendit të Kosovës u dënua me 25 vjet burg nga Dhomat e Specializuara të Hagës.
Në një postim në rrjetet sociale, ajo ka bërë me dije se gjatë një telefonate, babai i saj i ka thënë se nuk ka pranuar t’i nënshtrohet një ekzaminimi mjekësor dhe se ka marrë vendimin për të mos pranuar më trajtim shëndetësor nga institucionet ku ndodhet në paraburgim.
Siç ka treguar vajza e tij, Krasniqi e ka arsyetuar këtë qëndrim me faktin se beson se po mbahet padrejtësisht dhe se prej gjashtë vitesh i janë shkelur të drejtat njerëzore.
Ky lajm ka shkaktuar shqetësim tek anëtarët e familjes, sidomos tek Gresa, e cila ka theksuar se mosha e babait e bën edhe më të domosdoshëm kujdesin për shëndetin e tij.
Ajo ka shprehur se ndihet e pafuqishme përballë kësaj situate, duke u pyetur se si mund ta bindë të atin që të pranojë ndihmën e institucioneve ndaj të cilave ai ka humbur besimin.
“Si mund t’i kërkoj të pranojë kujdesin e atyre institucioneve, kur ai ndihet i tradhtuar pikërisht nga drejtësia që duhej ta mbronte?”, ka shkruar ajo në reagimin e saj.
Gresa ka treguar gjithashtu se gjatë telefonatës është përpjekur t’i japë forcë babait, duke i shprehur dashurinë dhe mbështetjen e familjes.
Në fund të mesazhit, ajo ka shprehur kundërshtim të fortë ndaj dënimit të tij, duke e cilësuar atë jo si një gabim që mund të korrigjohet, por si një padrejtësi.
Reagimi i saj vjen në një moment të vështirë për familjen Krasniqi, ndërsa shqetësimi kryesor i shprehur publikisht mbetet gjendja shëndetësore e ish-zyrtarit të lartë të Kosovës dhe vendimi i tij për të refuzuar kujdesin mjekësor.
Burimi: bordo.al
