Projekti i ri turk “Eşref Tek” po tërheq vëmendjen e publikut edhe përpara se të nisin xhirimet. Përveç kthimit të Çağatay Ulusoy në rolin e Eşrefit, një nga çështjet që po diskutohet gjerësisht është identiteti i aktores që do të jetë në krye të kastit të ri.
Sipas raportimeve të mediave turke, mes emrave që përmenden për rolin kryesor femëror janë Esra Bilgiç, Hande Erçel dhe Sümeyye Aydoğan. Megjithatë, deri më tani nuk ka asnjë konfirmim zyrtar se cila prej tyre do t’i bashkohet projektit.
Interesimi për përzgjedhjen e aktores vjen në një moment kur ekipi po punon për plotësimin e kastit. Sipas producentit Timur Savcı, përveç Çağatay Ulusoy, në projekt do të rikthehet edhe Görkem Sevindik, i njohur për rolin e Kadir në “Eşref Rüya”. Pjesa tjetër e kastit pritet të përbëhet nga emra të rinj.
Ndryshe nga një vazhdim i drejtpërdrejtë i serialit “Eşref Rüya”, “Eşref Tek” do të kthehet pas në kohë, për të treguar historinë që e shndërroi Eşrefin në personazhin që publiku njeh sot. Ngjarjet do të përqendrohen te vitet e tij të mëhershme, lidhja me Kadirin dhe hapat e parë në botën e nëndheshme të Stambollit.
Projekti është planifikuar të ketë tetë episode dhe të publikohet në platformën Prime Video. Sipas raportimeve të mediave turke, xhirimet pritet të nisin në nëntor, ndërsa data e publikimit ende nuk është bërë e ditur.
Deri në një njoftim zyrtar nga produksioni, mbetet të shihet se cila aktore do të marrë rolin kryesor dhe do t’i bashkohet Çağatay Ulusoy në këtë histori të re. /Prive By LS
Burimi: privebruto.com
