Një etapë e rëndësishme e gazetarisë botërore pritet të përfundojë në qershor 2027, kur Christiane Amanpour do të largohet nga CNN, pas 43 vitesh pune në këtë rrjet mediatik.
Vetë gazetarja njoftoi largimin, duke e shoqëruar me një koment humoristik për lidhjen e saj me televizionin: “Marrëdhënia jonë zgjati më shumë se shumë martesa”.
Amanpour e nisi karrierën në CNN në vitin 1983 dhe, me kalimin e dekadave, u bë një nga gazetaret më të njohura në skenën ndërkombëtare. Ajo raportoi drejtpërdrejt nga vende të prekura nga luftëra dhe kriza, ndërsa intervistat me liderë politikë dhe personalitete me ndikim i dhanë asaj një rol të rëndësishëm në pasqyrimin e ngjarjeve që kanë formësuar botën.
Profesionalizmi dhe përvoja në terren e kthyen atë në një nga figurat emblematicë të CNN-it, veçanërisht në mbulimin e konflikteve të armatosura dhe zhvillimeve me rëndësi globale. Largimi i saj do të shënojë fundin e një bashkëpunimi që zgjati më shumë se katër dekada.
Përveç angazhimit në CNN, gazetarja ka drejtuar emisionin “Amanpour & Company”, të transmetuar nga televizioni publik amerikan PBS. Sipas raportimeve, ky program pritet të mbyllet në dhjetor 2026, disa muaj përpara largimit të saj nga CNN.
Sipas Amanpour, vendimi për t’i dhënë fund kësaj etape erdhi pas një periudhe reflektimi. Gazetarja shprehu dëshirën për t’iu përkushtuar projekteve të reja, pa dhënë detaje të mëtejshme për planet e saj të ardhshme.
Ajo sqaroi gjithashtu se vendimin nuk e ka lidhur me ndryshimet në pronësinë e kompanisë mëmë të CNN-it.
Pas 43 vitesh në ekran, largimi i Amanpour shënon fundin e një epoke për rrjetin amerikan dhe lë pas një karrierë të ndërtuar mbi raportimin nga vatrat e krizave, intervistat e rëndësishme dhe ndjekjen e zhvillimeve që kanë tërhequr vëmendjen e mbarë botës.
Burimi: bordo.al
