Avokati Spartak Ngjela vlerëson se mungesa e protestave të vazhdueshme në qytetet e tjera të vendit është një nga arsyet kryesore pse kryeministri Edi Rama nuk e ndjen veten të kërcënuar nga lëvizja protestuese. “Ndryshimi politik kërkon një zinxhir racional dhe jo shkëputje. Çfarë po ndodh këtu? Pse është i qetë Rama? Sepse nuk ka protesta zinxhir në Durrës, Shkodër, Gjirokastër”, deklaroi Ngjela.
Roli i faktorit ndërkombëtar
Avokati foli edhe për rolin e faktorit ndërkombëtar, duke theksuar se protestat paqësore janë pjesë e demokracisë dhe nuk përbëjnë arsye për kundërshtimin e lëvizjes qytetare. Sipas tij, situata do të ndryshonte nëse demonstratat do të shoqëroheshin me akte dhune.
“Faktori ndërkombëtar nuk del kundër demokracisë. Ata shprehen kundër dhunës sepse do të detyroheshin të godasin lëvizjen. Kur nuk ka dhunë, ata janë me revoltën dhe demonstratat, sepse është filozofia e tyre. Në rast se këtu krijohet dhunë, ata dalin menjëherë kundër”, u shpreh Ngjela në ”Report TV”.
Pasojat e mundshme për kryeministrin
Sipas tij, përdorimi i dhunës nga ana e qeverisë për të shpërndarë protestuesit mund të krijonte pasoja të rënda politike për kryeministrin. Një ndërhyrje e tillë do ta vendoste Ramën në një pozicion më të ndërlikuar, edhe pse avokati nuk pret që kryeministri të zgjedhë këtë rrugë. “Në qoftë se partia apo qeveria i shpërndan me dhunë, Rama do ta ketë të vështirë. Por Rama nuk e bën këtë”, përfundoi Ngjela.
Burimi: kohajone.com
