Kryeministri i Maqedonisë së Veriut, Hristijan Mickoski, deklaroi se vendi i tij prej kohësh e meriton anëtarësimin në Bashkimin Evropian (BE), por për shkak të disa arsyeve artificiale ende nuk ka arritur t’i nisë negociatat për anëtarësim, sipas raportimit të Anadolu.
Në fjalën e tij para Samitit të Procesit të Berlinit në Mal të Zi, gjatë pritjes nga kryeministri malazez Milojko Spajiq, Mickoski u shpreh se pret mesazhe të forta për integrimin e Ballkanit Perëndimor në BE, si dhe diskutime kuptimplota e rezultate konkrete nga samiti.
Hristijan Mickoski për dosjen maqedonase
“Dosja maqedonase është komplekse. Ne e kemi merituar të ishim pjesë e BE-së shumë kohë më parë, por, fatkeqësisht, për shkak të disa arsyeve artificiale, ende nuk jemi në gjendje t’i fillojmë negociatat”, tha Mickoski.
Ai theksoi se gjatë fjalimit të tij do të përcjellë mesazhin për përkushtimin e fortë të Qeverisë së Maqedonisë së Veriut ndaj agjendës së reformave të BE-së dhe integrimit evropian. Mickoski shtoi se veprimet e qeverisë së tij janë në përputhje me këtë synim dhe se vendi do të vazhdojë në të njëjtin drejtim edhe në të ardhmen.
Mickoski për sfidat globale
Duke iu referuar situatës globale, ai tha se bota po përballet me kohë sfiduese, duke përmendur luftën e Rusisë në Ukrainë, luftën në Iran, krizën në tregjet financiare dhe protestat në mbarë Evropën.
“Ne duhet të gjejmë zgjidhje për të dalë nga kjo situatë në mbarë botën, veçanërisht në Evropë, dhe qeveria ime është e gatshme të kontribuojë në këtë drejtim”, tha ai.
“Shpresoj për diskutime kuptimplota dhe rezultate frytdhënëse nga samiti i sotëm”, përfundoi Mickoski.
Burimi: www.gazetaexpress.com
