Me rastin e 208-vjetorit të lindjes së Zef Jubanit, Akademia e Shkencave e Shqipërisë përkujtoi kontributin e një prej personaliteteve të dalluara të Rilindjes Kombëtare Shqiptare, i cili u angazhua për mbledhjen e folklorit, për zhvillimin kulturor dhe për forcimin e identitetit kombëtar.
Zef Jubani, folklorist dhe studiues i Shkodrës
I lindur në Shkodër më 25 tetor 1818, Zef Jubani ishte folklorist, shkrimtar, publicist dhe studiues, i cili dha një kontribut të rëndësishëm në dokumentimin dhe ruajtjen e trashëgimisë gojore shqiptare. Ai ishte ndër intelektualët e parë që iu qas në mënyrë sistematike studimit të kulturës popullore, duke mbledhur këngë, rapsodi, rrëfenja dhe krijime të tjera folklorike nga Shkodra dhe Malësia përreth.
Puna e tij arriti kulmin më 1871, kur në Trieste botoi veprën “Përmbledhje këngësh popullore dhe rapsodish shqiptare” (Raccolta di canti e rapsodie di poemi albanesi), e cila konsiderohet një nga botimet themelore në historinë e folkloristikës shqiptare.
Angazhimi për arsimin dhe çështjen shqiptare
Pas studimeve në Maltë, ku u njoh me idetë përparimtare të kohës dhe përfitoi një formim të gjerë gjuhësor e kulturor, Jubani u angazhua në administratë dhe në veprimtari diplomatike e kulturore. Në qendër të interesimeve të tij mbetën çështja shqiptare, përhapja e arsimit në gjuhën shqipe dhe përparimi shoqëror e kulturor i vendit.
Përmes shkrimeve dhe studimeve të tij, ai mbrojti rëndësinë e dijes, zhvillimit kulturor dhe çlirimit të mendimit nga paragjykimet që pengonin përparimin. Veprimtaria e tij ndihmoi në ruajtjen e krijimeve që deri atëherë përcilleshin kryesisht përmes traditës gojore, duke i dhënë vlerë të veçantë kujtesës historike dhe shpirtërore të shqiptarëve.
Zef Jubani u nda nga jeta më 1 shkurt 1880, por vepra e tij mbetet pjesë e rëndësishme e trashëgimisë kulturore shqiptare dhe e historisë së studimeve folklorike e albanologjike./KultPlus.com
Burimi: kultplus.com
