TIRANË, 22 tetor/ATSH/ Në Prishtinë është hapur ekspozita “Luigj Gurakuqi në dokumentet e Arkivit Qendror Shtetëror”, e cila u organizua nga Instituti i Historisë “Ali Hadri”, së bashku me Drejtorinë e Përgjithshme të Arkivave të Shqipërisë dhe Agjencinë Shtetërore të Arkivave të Kosovës.
Kjo ekspozitë ofron një rast të posaçëm për t’u njohur më nga afër me jetën dhe kontributin e Luigj Gurakuqit në historinë kombëtare shqiptare.
Instituti i Historisë dhe dokumentet arkivore
Drejtoresha e Institutit të Historisë, Teuta Shala, theksoi se dokumentet arkivore vërtetojnë përkushtimin e Luigj Gurakuqit në arsim, në gjuhën shqipe dhe në çështjen kombëtare.
Në inaugurimin e ekspozitës mori pjesë edhe drejtori i përgjithshëm i DPA-së, Auron Rrokaj.
“Nesër konferenca do të ilustrojë aspekte të jetës së Luigj Gurakuqit përmes studiuesve që do të marrin pjesë. Qëllimi i ekspozitës dhe i konferencës së nesërme nuk është vetëm dëgjimi i kumtesave që përgatisin studiuesit, por t’u përcjellim qytetarëve të Kosovës e të Shqipërisë veprën e këtij patrioti të madh”, deklaroi Rrokaj.
Kreu i DPA-së shtoi se institucionet arkivore kanë për mision ruajtjen e dokumenteve, por edhe vënien e tyre në dispozicion të qytetarëve, studiuesve dhe studentëve. Përmes marrëveshjeve të bashkëpunimit me institucionet në Kosovë, synohet lehtësimi i qasjes në dokumentet arkivore dhe njohja më e mirë e historisë përmes fakteve dhe dëshmive dokumentare.
Kontributi i Gurakuqit në Rilindjen Kombëtare
Zëvendësdrejtori ekzekutiv i Agjencisë Shtetërore të Arkivave të Kosovës, Mehmet Xhemajli, vlerësoi se Gurakuqi ishte një nga personalitetet e shquara të Rilindjes Kombëtare Shqiptare, duke theksuar kontributin e tij në zhvillimin e arsimit shqip, në shpalljen e pavarësisë së Shqipërisë dhe në konsolidimin e shtetit shqiptar.
1 nga 5
Burimi: ata.gov.al
