Prokuroria Themelore në Pejë ka njoftuar se më 22 tetor ka marrë një kërkesë nga A.Z., e cila tashmë ka ndërruar jetë, ku kërkohej ndërhyrje e menjëhershme ndaj zyrtarëve të institucioneve përgjegjëse, për shkak të pretendimeve të saj lidhur me neglizhencën në trajtimin e rasteve, duke përfshirë edhe ekzekutimin e një vendimi gjyqësor.
Regjistrimi i kërkesës dhe vlerësimi i përgjegjësisë penale
Sipas njoftimit të Prokurorisë, kryeprokurorja ka urdhëruar që kërkesa të regjistrohet dhe të trajtohet nga prokurori kompetent, me qëllim që të vlerësohen pretendimet për përgjegjësi penale në lidhje me veprën penale “Keqpërdorimi i pozitës apo autoritetit zyrtar”.
Kërkesa i është përcjellë për trajtim urgjent edhe institucioneve përkatëse, duke përfshirë Drejtorinë Rajonale të Policisë në Pejë, Gjykatën Themelore në Pejë, Drejtorinë për Mirëqenie Sociale dhe Qendrën për Punë Sociale.
Prokuroria u ka kërkuar këtyre institucioneve të shqyrtojnë pretendimet e paraqitura dhe të verifikojnë nëse ka pasur lëshime ose veprime të parregullta nga zyrtarët përgjegjës.
Ekzekutimi i vendimit gjyqësor për shfrytëzimin e shtëpisë
Lidhur me kërkesën e viktimës për ekzekutimin e vendimit gjyqësor që kishte të bënte me shfrytëzimin e barabartë të shtëpisë, Prokuroria ka njoftuar se ekzekutimi i tij u mundësua nga prokurorja kujdestare, në bashkëpunim me Policinë e Kosovës.
Prokuroria Themelore në Pejë ka theksuar se rrethanat e rastit, duke përfshirë pretendimet e paraqitura nga viktima dhe veprimet e ndërmarra nga institucionet përgjegjëse, do të trajtohen me seriozitet dhe profesionalizëm, në përputhje me procedurat ligjore.
Në përfundim të njoftimit, Prokuroria ka shprehur ngushëllimet më të sinqerta për familjen e viktimës.
Burimi: insajderi.org
