Një konferencë shkencore e mbajtur në Prishtinë mblodhi së bashku studiues dhe përfaqësues institucionesh nga Kosova, Shqipëria dhe Maqedonia e Veriut për të diskutuar mbi funksionin e Gjykatave Kushtetuese në mbrojtjen e lirive themelore dhe në forcimin e shtetit të së drejtës.
Organizimi i konferencës në Prishtinë
Aktiviteti me temë “Roli i Gjykatës Kushtetuese në Republikën e Kosovës dhe në Republikën e Shqipërisë: Perspektivë krahasuese” u organizua nga Akademia e Shkencave dhe e Arteve e Kosovës, në bashkëpunim me Akademinë e Shkencave të Shqipërisë.
Në emër të Akademisë së Shkencave të Shqipërisë, sekretarja shkencore, akademike Anila Hoda, vlerësoi rëndësinë e diskutimit mbi drejtësinë kushtetuese, duke theksuar se gjykatat kushtetuese kanë rol themelor në garantimin e respektimit të Kushtetutës, mbrojtjen e lirive dhe të drejtave të qytetarëve dhe ruajtjen e ekuilibrit ndërmjet pushteteve.
Sipas saj, pavarësisht përvojave të ndryshme historike në ndërtimin e institucioneve kushtetuese, Shqipëria dhe Kosova kanë objektiva të përbashkëta në forcimin e demokracisë, konsolidimin e shtetit të së drejtës dhe përafrimin me standardet evropiane.
Gjatë konferencës u trajtuan çështje që lidhen me interpretimin kushtetues, marrëdhëniet ndërmjet pushteteve, zbatimin e standardeve ndërkombëtare dhe garantimin e të drejtave themelore.
Kontributet e Komisionit të Përhershëm të Shkencave Juridike
Në këtë veprimtari, përfaqësuesit e Komisionit të Përhershëm të Shkencave Juridike pranë Akademisë së Shkencave të Shqipërisë paraqitën tri kumtesa. Akademikja Aurela Anastasi trajtoi të drejtën për informim për mjedisin në gjykimin kushtetues, prof. dr. Ksenofon Krisafi u ndal te shteti i së drejtës në këndvështrimin juridiko-ndërkombëtar, Kosova dhe Dhomat e Specializuara, ndërsa prof. dr. Eralda Methasani Çani analizoi rolin e Gjykatës Kushtetuese në garantimin e të drejtave sociale gjatë periudhës 2016–2026.
Konferenca synoi nxitjen e shkëmbimit të përvojave profesionale dhe zhvillimin e bashkëpunimit shkencor ndërmjet dy akademive, duke kontribuar në debatin juridik për sfidat e drejtësisë kushtetuese dhe forcimin e institucioneve demokratike në të dyja vendet.
1 nga 4
/e.xh/r.e/j.p/
Burimi: ata.gov.al
