Sekretari amerikan i Mbrojtjes, Pete Hegseth, u takua të hënën me kryeministrin izraelit Benjamin Netanyahu gjatë një vizite të befasishme në Izrael, sipas raportimit të faqes së lajmeve Axios, e cila citoi dy burime të informuara për takimin.
Sipas këtij raportimi, vizita ndodhi në një moment të rëndësishëm politik, vetëm tetë ditë përpara zgjedhjeve të Knessetit, dhe në një kohë kur Uashingtoni dhe Tel Avivi po shqyrtojnë mundësinë e rifillimit të operacioneve të gjera ushtarake kundër Iranit.
Pasi Axios publikoi lajmin, Hegseth ndau në rrjetet sociale fotografi dhe mesazhe nga një vizitë te personeli ushtarak amerikan që shërben nën Komandën Qendrore të SHBA-së (CENTCOM), e cila është përgjegjëse për operacionet ushtarake amerikane në Lindjen e Mesme.
“Si gjithmonë, ka qenë një nder të vizitojmë luftëtarët tanë në CENTCOM sot. Më të mirët e vendit tonë, në një mision historik”, shkroi Hegseth.
Ndërkohë, presidenti amerikan Donald Trump shprehu të dielën mbështetjen e tij të plotë për Netanyahun, në prag të zgjedhjeve të 27 tetorit. Në një postim të gjatë në platformën e tij Truth Social, Trump deklaroi se i jepte “mbështetjen e plotë dhe totale” përpjekjes së kryeministrit izraelit për t’u rizgjedhur.
Trump vlerësoi lidershipin e Netanyahut dhe bashkëpunimin e tij me Uashingtonin, veçanërisht në përballjen me Iranin. Ai paralajmëroi gjithashtu se Shtetet e Bashkuara mund të detyrohen të marrin përsipër vetë barrën, nëse votuesit izraelitë zgjedhin një udhëheqës tjetër.
Takimi mes Hegseth dhe Netanyahut zhvillohet në një periudhë tensionesh të larta në Lindjen e Mesme, ndërsa zhvillimet politike në Izrael dhe diskutimet mbi strategjinë ndaj Iranit mbeten në qendër të vëmendjes
Burimi: euronews.al
