Policia belge ka përdorur gaz lotsjellës dhe sprej ndaj protestuesve në Bruksel gjatë një proteste ku qindra njerëz u mblodhën për të kundërshtuar politikat qeveritare dhe për të kërkuar financim më të mirë për sistemin arsimor.
Protesta në Bruksel
Kjo protestë është pjesë e një valë demonstratash që janë zhvilluar gjatë muajve të fundit, ku organizatorët kanë shprehur shqetësime për kushtet në arsim dhe kanë akuzuar policinë për përdorim të tepruar të forcës. Megjithatë, përplasjet e kësaj radhe ishin më pak të ashpra në krahasim me ato të javës së kaluar.
Gjatë incidenteve në kryeqytetin belg, disa protestues u panë duke ikur dhe duke rënë në tokë ndërsa ndiqeshin nga policia. Në një episod tjetër, demonstruesit hodhën tabela trafiku dhe objekte të tjera mbi një grumbull skuterësh dhe biçikletash me qira, në përpjekje për t’i vënë flakën.
Sipas raportimeve të mediave belge, policia përdori gaz lotsjellës për të shpërndarë turmën në disa momente të protestës.
Reagimi i policisë
Në një deklaratë të dhënë në orët e vona të pasdites, policia e Brukselit njoftoi se nuk ishin regjistruar incidente të mëdha. Megjithatë, pesë persona u ndaluan për prishje të rendit publik, ndërsa katër të tjerë për posedim të armëve të ndaluara.
Protestat në Bruksel zhvillohen në një periudhë kur demonstratat kundër politikave qeveritare dhe kërkesat për ndryshime në sektorin publik janë shtuar edhe në qytete të tjera evropiane, përfshirë Parisin dhe disa qytete të Italisë.
Burimi: abcnews.al
