Sulmuesi kosovar Muhamet Hyseni pritet të qëndrojë jashtë fushave për rreth gjashtë javë, për shkak të një dëmtimi muskulor. Problemet fizike e kanë shoqëruar që në fillimet e eksperiencës së tij në futbollin rumun.
Hyseni u transferua këtë sezon te Farul Constanța, skuadra e Superligës rumune, në formë huazimi nga klubi danez AC Horsens.
Në fazën e parë, sulmuesi kaloi një periudhë të vështirë në aspektin personal, pas humbjes së babait të tij në mesin e shtatorit. Përveç kësaj, ai priti edhe pajisjen me leje pune nga autoritetet rumune.
Paraqitja e parë si titullar dhe dëmtimi
Pasi i kapërceu këto pengesa, Hyseni u aktivizua për herë të parë si titullar me fanellën e Farulit dhe zhvilloi një paraqitje të mirë. Megjithatë, pas ndeshjes ai filloi të ndjente dhimbje në muskujt e barkut.
Trajneri i ekipit, Ioan Sabau, konfirmoi lëndimin dje, në konferencën për shtyp para ndeshjes me Otelul.
Mungesa dhe synimi për rikthim
Mungesa vjen në një moment kur Hyseni sapo kishte filluar të merrte minutat e para dhe të përshtatej me ekipin e ri dhe me kampionatin rumun.
Tani prioriteti kryesor është rikuperimi i sulmuesit, me qëllim që ai të kthehet sa më shpejt në dispozicion të skuadrës dhe të tregojë aftësitë e tij në futbollin rumun.
Burimi: www.albeu.com
