Egnatia shënoi një tjetër rezultat të rëndësishëm në fazën e grupeve të Conference League, duke barazuar 1–1 me Aarhusin në Danimarkë. Kampionët shqiptarë kishin mundësinë të synonin më shumë në këtë ndeshje, pasi kundërshtari mbeti me një lojtar më pak që në minutën e 3-të.
Eljon Sota vlerëson barazimin e Egnatias
Pavarësisht pikës së fituar në stadiumin “Cepheus Park”, mbrojtësi i Egnatias, Eljon Sota, shprehu keqardhje që skuadra nuk arriti të merrte fitoren, duke vlerësuar se me më shumë kujdes mund të ishte kthyer në shtëpi me 3 pikë.
“Po ta kishim diskutuar këtë rezultat para fillimit të takimit, do ta pranonim me kënaqësi, pasi luanim në transfertë ndaj një kundërshtari shumë të fortë, që vitin e kaluar u shpall kampion i Danimarkës. Është e njohur që kampionati danez ka një nivel mjaft të lartë.
Megjithatë, mënyra se si u zhvillua ndeshja na la disi të zhgënjyer. E vura re te shokët e skuadrës, por edhe te vetja, që prisnim më shumë. Ky është futbolli dhe jo çdo situatë mund të parashikohet.
Kishte raste kur mund të reagonim më mirë, sidomos në aksionin e golit që pësuam, por edhe në disa momente të tjera. Në fund, ky është futbolli. Mbi të gjitha, shpresoj që t’i kemi bërë tifozët tanë krenarë.
Mbështetjen e tyre e kemi ndier gjatë gjithë kohës. Edhe pse Rrogozhina është një qytet i vogël, tifozët nuk na kanë munguar në asnjë ndeshje, pavarësisht kundërshtarit. Ne luajmë edhe për ta, sepse ata janë mbështetja jonë kryesore”, deklaroi Sota.
Burimi: www.albeu.com
