Regjisori i mirënjohur Taika Waititi ka treguar se themeli i një martese të qëndrueshme qëndron në gjetjen e momenteve për t’u kushtuar njëri-tjetrit, madje edhe atëherë kur angazhimet profesionale dhe udhëtimet e shpeshta e komplikojnë këtë.
Gjatë një bisede për revistën australiane “Woman’s Day”, në kuadër të promovimit të projektit të tij të fundit “Klara and the Sun”, Waititi ka folur sinqerisht për jetën me bashkëshorten, këngëtarja me rrënjë kosovare, Rita Ora, duke treguar se si ata përpiqen ta mbajnë lidhjen e tyre të fortë përkundër angazhimeve të shumta.
Waititi ka sqaruar se të dy kanë agjenda të mbushura dhe shpesh udhëtojnë në vende të ndryshme të botës, gjë që e vështirëson gjetjen e kohës së përbashkët.
Është tepër e vështirë kur secili prej jush ka karrierën e vet dhe jeni vazhdimisht në lëvizje, duke u munduar të gjeni momente për njëri-tjetrin nëpër vende të ndryshme të botës
-ka thënë ai.
Regjisori ka treguar se çifti bën përpjekje të ndërgjegjshme që të mos mbetet i ndarë për periudha të gjata.
Ne bëjmë një përpjekje të sinqertë që të mos kalojnë më shumë se disa javë pa u takuar. Në të kundërt, gjithçka nis të bëhet e ndërlikuar. Njeriu fillon të mësohet me vetminë dhe kjo nuk është aspak pozitive. Një mësim që e kemi marrë të dy është se duhet t’i kushtosh kohë një lidhjeje
-ka deklaruar Waititi.
Gjatë intervistës, Waititi ka folur edhe për lidhjen e bashkëshortes me Zelandën e Re, vendin ku ai ka lindur. Sipas tij, Rita e ka përqafuar stilin e jetesës atje dhe e shikon këtë vend si një vend ideal për t’u larguar nga ritmi i ngarkuar i përditshmërisë.
Ajo e adhuron shtëpinë. Kur vjen këtu, e trajton Zelandën e Re si një resort të madh. Relaksohet, nuk bën asgjë dhe e shijon vërtet atë kohë të lirë
-ka treguar regjisori.
Për çiftin, koha e kaluar larg detyrimeve profesionale përbën një mundësi për t’u rikthyer te rutina e përditshme dhe për të shijuar praninë e njëri-tjetrit pa stresin e punës.
Rita Ora dhe Taika Waititi u martuan në gusht të vitit 2022. Këngëtarja ka ndërtuar një karrierë ndërkombëtare në muzikë dhe aktrim, ndërsa Waititi njihet si regjisor, skenarist dhe aktor, me vepra si “Thor: Ragnarok” dhe “Jojo Rabbit”.
Pavarësisht ritmit të tyre të ngarkuar, deklaratat e regjisorit tregojnë se çifti përpiqet ta vendosë marrëdhënien në krye të prioriteteve, duke mos e lejuar distancën të bëhet pjesë e zakonshme e jetës së tyre.
Mesazhi i Waititit është i thjeshtë: një marrëdhënie nuk mbahet vetëm me ndjenja, por edhe me përkushtim, komunikim dhe kohë të kaluar së bashku. Edhe kur të dy partnerët kanë karriera të suksesshme, ruajtja e afërsisë kërkon përpjekje të vazhdueshme nga të dyja palët.
Burimi: www.topalbaniaradio.com
