Vetëm një javë pasi bëri të ditur se pret fëmijën e saj të tretë, Hilary Swank ka treguar sesi reaguan binjakët e saj trevjeçarë, Aya dhe Ohm, kur mësuan se familja e tyre do të zgjerohet.
Në një intervistë në podkastin “Question Everything”, më 22 tetor, aktorja 52-vjeçare tregoi se të dy fëmijët e pritën lajmin me shumë entuziazëm, edhe pse reagimi i vajzës së saj e befasoi.
“Oh Zot, u emocionuan jashtëzakonisht shumë”, tha Swank. “Vajza ime nuk është nga ato që thonë ‘Ohh’ për çdo gjë. Asaj i pëlqen të bëjë si e egër dhe të thotë ‘Grrr’. E shpreh veten shumë përmes trupit. Por kur i tregova, ajo tha: ‘Ohh, aty brenda?’ [në bark] Ishte shumë e emocionuar dhe, sigurisht, edhe djali im.”
Binjakët presin me padurim ardhjen e bebit
Swank i ka binjakët me bashkëshortin e saj, Philip Schneider, me të cilin është martuar që prej vitit 2018. Gjatë intervistës, ajo tregoi gjithashtu se fëmijët mezi po presin ardhjen e pjesëtarit të ri të familjes.
“Sa herë që dal nga shtëpia dhe kthehem, më pyesin: ‘A ka ardhur bebi?’ U them: ‘Bebi do të vijë për Krishtlindje, ndërsa tani jemi ende në vjeshtë’. Por ata zgjohen çdo mëngjes dhe pyesin: ‘A erdhi koha e Krishtlindjeve?’ Janë vërtet shumë të emocionuar”, rrëfeu aktorja.
Entuziazmi i binjakëve është aq i madh, saqë ata ua tregojnë edhe njerëzve të panjohur lajmin e bukur. Sipas Swank, kur shohin bebe në restorante, u afrohen dhe u thonë se së shpejti do të kenë një motër ose vëlla.
“I shohin bebet në restorante, u afrohen dhe u thonë: ‘A mund t’ju tregoj diçka? Mami im ka një beb në bark dhe ai do të vijë për Krishtlindje’. Sa të ëmbël”, tregoi ajo.
Zbulimi i shtatzënisë dhe privatësia
Aktorja e bëri publike shtatzëninë më 14 tetor, përmes një postimi në Instagram, ku shkroi me humor: “Shumë njerëz më kanë pyetur se cili është projekti im i radhës. Ky publikohet në dhjetor”, shoqëruar me simbole që lidhen me një bebe.
Gjatë intervistës, Swank tregoi se arriti ta mbante shtatzëninë të fshehtë për një kohë të gjatë, pjesërisht falë vendit ku jeton. Ajo shpjegoi se banon në një qytet të vogël ku është rritur dhe se njerëzit e kanë respektuar gjithmonë privatësinë e saj.
“Jetoj në një qytet shumë të vogël. Është vendi ku jam rritur dhe të gjithë kanë qenë shumë të respektueshëm ndaj privatësisë sime. Lajmi nuk doli dhe, sigurisht, nuk qëndroj gjithë kohën në shtëpi. Kam qenë duke punuar deri kur isha rreth javës së 17-të të shtatzënisë, por as në sheshxhirim nuk e kishte kuptuar njeri”, tha ajo.
Swank shtoi se është një person që e vlerëson privatësinë dhe se nuk kishte pasur ndonjë arsye të veçantë për ta bërë publike shtatzëninë më herët. Megjithatë, vendosi të flasë për të pasi u miratua një nismë ligjore për pelenat, ku dëshironte të ishte e pranishme dhe të ndante lajmin me publikun.
“Jam një person mjaft privat dhe nuk kishte ndonjë arsye të veçantë për të thënë diçka. Por më pas u miratua ky ligj i mrekullueshëm për pelenat dhe doja të isha e pranishme. Kështu që thashë: ‘Përshëndetje të gjithëve dhe ja ku është bebi në barkun tim’”, përfundoi aktorja.
Burimi: anabelmagazine.com
