Kryeministri Edi Rama ka publikuar një status në orën 11.47, pak para orës 12.00, kur Partia Demokratike kishte thirrur protestën përpara kryeministrisë. Në shkrimin e tij, Rama thekson: “Protesta Paqësore është një vlerë demokratike dhe një sfidë qytetare që arrin kulmin me Dialog dhe Reflektim.
Dhuna në Protestë përbën një sfidë kriminale ndaj Shtetit, Ligjit dhe Sigurisë Publike, e cila nuk tolerohet dhe as justifikohet.
***Dje, VIP-at që japin ditë e natë mësime morali nga ekranet e korruptuara, të cilët në vend që të distancoheshin nga dhuna dhe ta dënonin atë, kanë marrë anën e dhunuesve dhe i këndojnë dhunës pa pushim, dolën në mbrojtje të të drejtave të listës së dhunuesve me precedent penal që morën pjesë në terrorizimin e Shqipërisë duke djegur e shkatërruar në Tiranë. Gjoja ata dhunues të përsëritur të ligjit, i mbron ligji nga ekspozimi publik, madje, sipas VIP-ave, edhe me identitet të fshehur!
Jo, ligji është për të mbrojtur publikun nga dhunuesit, jo dhunuesit nga informimi i publikut. Populli ka të drejtë të dijë kush fshihet pas maskave “studentore”.
Dhe falë teknologjisë e Inteligjencës Artificiale, maskat do të bien duke përdorur vetë videot e panumërta të publikuara në rrjetet sociale apo transmetuara në ekranet televizive”.
Burimi: kohajone.com
