Gjykata e Apelit ka konfirmuar aktvendimin e gjykatës së shkallës së parë, duke lejuar zgjatjen e masës së paraburgimit për një muaj ndaj Gani Gecit, i cili dyshohet se ka ushtruar presion ndaj gazetarit Lirim Mehmetaj.
Më parë, Gjykata Themelore e Prishtinës kishte caktuar paraburgim 30-ditor për Gecin.
Rrethanat e ngjarjes sipas Prokurorisë
Nga ana e Prokurorisë pretendohet se ngjarja nisi pas një shkrimi të publikuar nga Mehmetaj në Facebook, i cili kishte të bënte me deputetin Fatos Geci.
Sipas akuzave, Gani Geci i është drejtuar gazetarit me kërcënime, duke e shtyrë që ta hiqte ose ta ndryshonte postimin.
Në dokumentet e paraqitura për vendosjen e paraburgimit janë përfshirë edhe shprehjet që Geci dyshohet t’i ketë thënë Mehmetajt brenda redaksisë ku ai punon.
Autoritetet gjyqësore vijojnë hetimin e këtij rasti.
Burimi: www.albeu.com
