Shqipëria renditet ndër vendet e fundit në Europë për sa i përket numrit të të diplomuarve me doktoratë në fushat e shkencës, matematikës, informatikës, inxhinierisë, prodhimit dhe ndërtimit, në raport me popullsinë e re.
Të dhënat e Eurostat për Shqipërinë
Sipas të dhënave të Eurostat, gjatë vitit 2023 Shqipëria kishte 0 të diplomuar me doktoratë për çdo 1 mijë banorë të moshës 25–34 vjeç, krahasuar me 0.9 doktorata për 1 mijë banorë në Bashkimin Europian. Edhe në vitet para 2023, numri i diplomave të doktoratës në shkenca në vendin tonë ka qenë në nivele shumë të ulëta.
Diferenca vihet re qartë edhe kur krahasohemi me vendet e rajonit. Në vitin 2023, Serbia kishte 0.5 të diplomuar me doktoratë për 1 mijë banorë të moshës 25–34 vjeç, ndërsa Mali i Zi dhe Maqedonia e Veriut kishin nga 0.1 për 1 mijë banorë.
Në disa nga ekonomitë më të zhvilluara europiane treguesi ishte dukshëm më i lartë. Zvicra kryesonte me 1.9 doktorantë të diplomuar për 1 mijë banorë të moshës 25–34 vjeç, ndërsa Franca dhe Luksemburgu kishin nga 1.3. Gjermania dhe Suedia regjistronin nga 1.1 për 1 mijë banorë.
Treguesi i Eurostat përfshin doktoratat në një grup fushash që konsiderohen të lidhura drejtpërdrejt me kapacitetet shkencore dhe teknologjike të një ekonomie: shkencat, matematika, informatika, inxhinieria, prodhimi dhe ndërtimi.
Situata sipas gjinisë
Të dhënat sipas gjinisë tregojnë se situata në Shqipëri ka mbetur në nivele minimale gjatë viteve të fundit. Për meshkujt, treguesi ishte 0 për 1 mijë banorë në vitin 2021, u rrit në 0.1 në vitin 2022, ndërsa në vitin 2023 u kthye sërish në 0. Për femrat, treguesi ishte 0.1 në vitin 2021 dhe 2022, ndërsa në vitin 2023 ishte 0.
Në Bashkimin Europian diferenca mes meshkujve dhe femrave është ende e dukshme. Në vitin 2023, numri i meshkujve të diplomuar me doktoratë në këto fusha ishte 1.1 për 1 mijë banorë të moshës 25–34 vjeç, ndërsa për femrat ishte 0.7 për 1 mijë.
Për vitin 2024, mesatarja e BE-së u rrit në 1.1 për 1 mijë te meshkujt dhe 0.8 te femrat. Për Shqipërinë, Eurostat nuk paraqet të dhëna për vitin 2024 në tabelën e publikuar.
Këto të dhëna janë pjesë e statistikave të Eurostat për të diplomuarit në nivel doktorate dhe maten si numër të diplomuarish për çdo 1 mijë banorë të grup-moshës 25–34 vjeç.
Të dhënat për doktorantët në shkenca shihen si një faktor kyç për t’u sjellë vendeve transformimet teknologjike dhe industriale.
Burimi: www.cna.al
