Bashkimi Evropian e ka vlerësuar si të mirë ardhur vendimin e presidentes së Kosovës, Justina Shiroka-Pula, që ta kthejë në Kuvend për rishqyrtim Ligjin për Dhomat e Specializuara në Hagë. Megjithatë, ai ka dhënë të kuptohet se pret të konsultohet në rast se diskutimet për ndryshimin e këtij ligji rifillojnë në Kuvend.
“BE-ja vazhdimisht ka shprehur shqetësim të thellë për nismën për ndryshimin e Ligjit për Dhomat e Specializuara të Kosovës, si para ashtu edhe pas miratimit nga Kuvendi i Kosovës më 6 tetor”, deklaroi një zëdhënës i BE-së.
Ai theksoi se Kosova ka marrë përsipër detyrime për konsultime me Bashkimin Evropian lidhur me ndryshimet ligjore që prekin mandatin dhe procedurat e Gjykatës Speciale.
“Në frymën e letërkëmbimit mes përfaqësueses së lartë të BE-së dhe presidentes së Kosovës, që përcakton modalitetet e konsultimit me BE-në para ndryshimit të legjislacionit, presim që BE-ja të konsultohet nëse diskutimet rinisin në Kuvend”, u shpreh zëdhënësi.
Kthimi i ligjit për rishqyrtim
Presidentja Shiroka Pula e ktheu ligjin për rishqyrtim më 22 tetor, pas kërkesës së Partisë Demokratike të Kosovës, e cila synon që ai të shqyrtohet sërish dhe të hyjë në fuqi. PDK-ja ka deklaruar se procesi synon përmirësimin e dispozitave dhe forcimin e sigurisë juridike.
Ndryshimet në ligj u miratuan më 6 tetor, pas protestave kundër dënimeve në shkallë të parë për katër ish-krerët e UÇK-së: Hashim Thaçi, Kadri Veseli, Jakup Krasniqi dhe Rexhep Selimi. Ndër të tjera, ato parashikojnë kufizime të juridiksionit të Gjykatës Speciale, dënime deri në 15 vjet burgim dhe mundësinë e faljes presidenciale për të dënuarit.
Shqetësimet e BE-së
Miratimi i ndryshimeve ka nxitur shqetësime nga BE-ja për respektimin e detyrimeve ndërkombëtare të Kosovës dhe pavarësinë e Dhomave të Specializuara dhe Zyrës së Prokurorit të Specializuar. Vetë Gjykata Speciale ka bërë të ditur se nuk është konsultuar për nismën.
Ndërkohë, BE-ja pret që çdo diskutim i mëtejshëm për ligjin të zhvillohet në përputhje me zotimet e Kosovës dhe përmes konsultimeve të nevojshme me institucionet evropiane.
Burimi: shqiptarja.com
