Kancelari gjerman Friedrich Merz deklaroi të shtunën se Rusia po ndërmerr veprime për të destabilizuar Gjermaninë, duke theksuar se Moska përbën një rrezik në rritje për sigurinë në Evropë.
Paralajmërimi i Merz për kërcënimin rus
“Po përballemi me një kërcënim të madh në lindje të kontinentit tonë. Agresioni ushtarak i Rusisë kundër Ukrainës ka tronditur thellësisht rendin e paqes në Evropë”, u shpreh Merz gjatë një konvente të Unionit Kristian Social, partisë bashkëqeverisëse, në Mynih.
“Gjithashtu shohim se Rusia synon të destabilizojë Gjermaninë, ditë pas dite”, shtoi ai.
Merz theksoi se kërcënimi nuk kufizohet vetëm në Ukrainë, duke përmendur sulme kibernetike, akte sabotimi dhe përpjekje për të goditur infrastrukturën kritike në të gjithë Evropën.
Rreziku që shtrihet përtej Ukrainës
“Ky kërcënim nuk është më i kufizuar vetëm në Ukrainë. Në të gjithë Evropën po shohim sulme kibernetike, sabotim, përpjekje për sulme ndaj infrastrukturës kritike, si ai në Aeroportin e Leipzigut më 4 gusht, dhe përpjekje për të destabilizuar shoqërinë tonë demokratike”, deklaroi ai.
“E gjithë kjo rrezikon lirinë tonë, dhe për këtë arsye po investojmë në mbrojtjen e lirisë sonë”, shtoi ai.
Këto deklarata pasuan një paralajmërim të mëparshëm nga shefi i inteligjencës së jashtme të Gjermanisë për rrezikun që vendi të përfshihet në një konflikt të armatosur me Rusinë.
Burimi: euronews.al
